கர்நாடகாவில் தென்பெண்ணை ஆற்றின் நீர்ப்பிடிப்பு பகுதிகளில் பெய்த மழையினால், கிருஷ்ணகிரியில் அமைந்துள்ள கே.ஆர்.பி. (கிருஷ்ணகிரி ரிசர்வாயர் திட்டம்) அணைக்கு நீர்வரத்து இருந்தது. ஆனால் தற்போது இந்த ஆண்டில் இரண்டாவது முறையாக அணைக்கு நீர்வரத்து முற்றிலும் நின்றது.
இந்த அணை கட்டப்பட்டதிலிருந்து முதல் முறையாக 2020ஆம் ஆண்டு மே 1-ஆம் தேதி, அணைக்கு எந்தவிதமான நீர்வரத்தும் இல்லாமல் அணை வறண்டது. பின்னர் நீர்வரத்து மீண்டும் துவங்கி, அணையில் 50 அடி அளவிற்கு மட்டுமே தண்ணீர் சேமிக்கப்படும் நிலை தொடர்ந்தது.
கடந்த ஆண்டு அக்டோபர் 9-ஆம் தேதி, அணையின் நீர்மட்டம் 50 அடியை எட்டியது. அதன் பிறகு தொடர்ந்து சீரான நீர்வரத்து இருந்ததால், மார்ச் 8 வரை — 150 நாட்களுக்கு மேலாக — 50 அடிக்கு மேல் தண்ணீர் இருப்பு இருந்தது. ஆனால் இந்த ஆண்டு மார்ச் 10-ஆம் தேதி முதல், முதல் முறையாக நீர்வரத்து முற்றிலுமாக நின்றது.
அதன்பின் நான்கு நாட்களுக்குப் பிறகு, மீண்டும் நீர்வரத்து துவங்கி சில நாட்களுக்கு சீராக நீர் வந்தது. எனினும் கடந்த சில நாட்களாக மழையின்றி நீர்வரத்து குறைந்த நிலையில் இருந்தது. கடந்த இரண்டு நாட்களில் தினசரி சுமார் 12 கன அடி நீர் மட்டுமே வந்த நிலையில், நேற்று (ஏப்ரல் 30) முற்றிலும் நீர்வரத்து நின்றுவிட்டது.
அணையிலிருந்து தற்போது தினசரி 12 கன அடி நீர் வெளியேற்றப்படுகின்றது. அணையின் முழு உயரம் 52 அடி ஆகும். நேற்று அதன் நீர்மட்டம் 49.05 அடி மட்டுமே இருந்தது.
Copyright @2024 WMP CREATIVE AGENCY. All rights reserved
